Agenća, prowokacije a zwada wo wustawowych sudnikow Pólsku zaběraja

Waršawa (dpa/SN/MG). Tajne słužby Pólskeje su wjacorych pozdatnych agentow zajeli, kotřiž su – pječa w nadawku Ruskeje – komponenty za twar brónjow a municije organizowali. Mjez podhladnymi je 37lětna ruska staćanka, dalši pjećo su Polacy w starobje mjez 25 a 52 lětami, zdźěli minister za koordinaciju tajnych słužbow Tomasz Siemoniak na platformje X. Po informacijach portala Onet su zastojnicy nutřkokrajneje tajneje słužby ABW wot 21. oktobra do 2. nowembra 21 městnosćow w třoch regionach přepytali a podhladnych při tym zajeli. Skupina podhladnych je po wšěm zdaću wšelke dźěle nakupiła, kotrež hodźa so za twar brónjow abo municije wužiwać. Tute su potom do Ruskeje dowjezli a tam předali.

Statne rěčnistwo wo tym informuje, zo wšěm čłonam skupiny sobustawstwo w kriminelnym zhromadźenstwje wumjetuja. Tohodla pad nětko wotpowědnje přepytuja.