Budyšin. Serbska komorna filharmonija Serbskeho ludoweho ansambla pod hudźbnym nawodom Kathariny Dickopf je wčera wječor hudźbnu prapremjeru prezentował. Lukaša Čórlichowa 1. sinfonija je na kóncu 1. sinfoniskeho koncerta w tutej hrajnej dobje w rjedźe štyrjoch kompozicijow pod hesłom „Najprjedy hra, potom chutnje“ zaklinčała. Žurla SLA běše derje wopytana. Program běše zajimcam dosć wulke wabjenje, sej hudźbny wječor lubić dać. Sinfonija čo. 1 Es-dur Wolfganga Amadeusa Mozarta (1756-1791) a sinfonija čo. 49 f-moll „La passione“ Josepha Haydna (1732-1809) je orchester wuměłsce derje zanjesł, jimaj pak pobrachowaše trochu žiwjenja. To rěka, zo móhli so barby instrumentow bóle swěćić. Concerto Es-dur za komorny orchester „Dumbarton Oaks“ z pjera Igora Strawinskeho (1882-1971) sej z wjace hudźbnikami zesylnjeny orchester zasłuži. Tak móhli akcenty, kotrež kompoziciju noša, sylnišo skutkować a bóle błyšćić. Tomu je bjezdwěla stajnje a zaso parowana koncertna akustika hrajnišća zadźěwała. Sinfonija 1, kompozicija Lukaša Čórlicha (nar. 1997), běše prapremjera tohole wječora.