Praha (SN/LuNo). Znata a mjez turistami woblubowana Zlatá ulička (Złota haska) na Praskim hrodźe je wot spočatka winowca kusk hinaša, hač jón wopytowarjo znaja. Tuchwilu chowa so mjenujcy wjetšina domow za twarskimi róštami. Na 15 wot dohromady 16 domach ponowjeja tam hač do klětušeho fasady, třěchi a durje. Poslednju šěsnatu chěžu chcedźa pozdźišo saněrować – jeje staw je najšpatniši.
Wšitke twarske naprawy přewjedu bjez zawrjenja haski za turistow. Na kóncu rekonstrukcije změje haska zaso samsny napohlad kaž w prěnjej połojcy 20. lětstotka. Tehdy běchu posledni wobydlerjo z domskich wućahnyli, hakle potom su hasku za turistiske zaměry přetworili. Jeje typisku bajkojtu a pisanu podobu stej w lěće 1955 sławny a tež w Němcach znaty moler, klankar a filmowc Jiří Trnka a architekt Pavel Janák jako wuraz bydlenja chudeje klasy stworiłoj. Swoje započatki ma haska w lěće 1597. Tehdy je kejžor Rudolf II swojim hrodowym stražowarjam dowolił, sej při hrodowej muri swoje domčki natwarić.
