W turkowskim měsće Antalya klimowy wjeršk COP31 so zahajił
Antalya (dpa/SN). Wuskutki klimoweje krizy smy lětsa tak jasnje pytnyli, kaž lědma hdy prjedy: Infernaliske lěsne wohenje po cyłym swěće, sylne powodźenja w Nepalu a europske rěki z historisce niłkej wodu wulkeje suchoty dla. Na wulkim krizowym zetkanju, na 31. swětowej klimowej konferency Zjednoćenych narodow (UN), so wot wčerawšeho něhdźe 70 000 delegatow w turkowskim měsće Antalya schadźuje.
Kritikarjo wšak hižo wjele lět na zmysle gigantiskeje konferency dwěluja. Woni kritizuja na přikład princip konsensa při schwalenju rozsudow, čehoždla su zmysłapołne dojednanja mjez dohromady něhdźe 190 wobdźělenymi statami lědma móžne. Jelizo pak k dojednanju dóńdźe, nima UN skutkowne móžnosće chłostanja w padźe, zo so wone njedodźerži, štož je dalša přičina kritiki. Konferency minjenych lět su nimo toho pokazali, zo njeje škit klimy hłowny zaměr mnohich statow. Město toho steja hospodarske cile na prěnim městnje.
