Pjeć krajow EU planuje natwar strukturow w afriskej Ruandźe
Wien (dpa/SN). Němska, Awstriska a tři dalše staty EU zahaja jednanja z Ruandu wo natwarje centruma za wotsuwanje w kraju. Jich cil je, hižo w lěće 2027 wotpokazanych požadarjow wo azyl do kraja na wuchodźe Afriki dowjesć, připowědźi awstriski kancler Christian Stocker. Do toho bě němski zwjazkowy nutřkowny minister Alexander Dobrindt (CSU) ze swojimi kolegami z Danskeje, Grjekskeje, Nižozemskeje a Awstriskeje we Wienje wo planach wuradźował. Dobrindt plany zakitowaše, kotrež bě partner w koaliciji SPD hižo kritizował. „Return Hubs“ su „pozitiwny wuhlad za ludźi bjez prawa na wostaće a bjez perspektiwy w Europje, kotrychž domjace kraje pak jich hižo wróćo brać nochcedźa“, wuzběhny politikar CSU. Wón pak so tež druheho wuskutka tak mjenowaneho Ruanda-pakta nadźija: „Wottrašenje je cyle jednorje tež dźěl planow“, wón rjekny.





