Washington/Brüssel/Moskwa (dpa/SN). USA a Europa su z paketom chłostanjow na najnowšu eskalaciju Moskwy w krizy Ukrainy dla reagowali. Europska unija wobzamkny přećiwo Ruskej sankcije, kotrež maja hižo wot dźensnišeho płaćić. Tež knježerstwo USA je prěnje chłostanja Ruskej wobzamknyło a dalše připowědźiło. Wonkowny minister USA Antony Blinken je jutře planowane zetkanje ze swojim ruskim kolegu Sergejom Lawrowom wotprajił. Běły dom móžne zetkanje prezidenta USA Joewa Bidena a ruskeho prezidenta Wladimira Putina najprjedy raz wuzamkuje. Biden liči z dalšej eskalaciju ze stron Ruskeje a z wulkim nadpadom na susodnu Ukrainu.
Hladajo na połoženja přepołoža USA přidatnych wojakow a techniku do wuchodneje Europy. Ukrainski prezident Wolodymyr Zelenskyj připowědźi we widejowym poselstwje dźělnu mobilizaciju rezerwistow.
Berlin (dpa/SN). Zwjazkowe knježerstwo je dźensa wotpohladej, minimalnu mzdu na dwanaće eurow zwyšić, puć rubało. Zakonski naćisk zwjazkoweho ministra za dźěło Hubertusa Heila (SPD) předwidźi, delnju mzdowu hranicu w Němskej wot 1. oktobra z jónkrótnej kročelu na dwanaće eurow zwyšić. Něhdźe 6,2 milionaj ludźi změjetej z toho swoje lěpšiny.
Po posedźenju kabineta chcyše so minister Heil na wopyće w pjekarni njedaloko Magdeburga wo konkretnych wuskutkach zwyšeneje minimalneje mzdy informować. Wobzamknjenju kabineta přizamknje so normalny parlamentariski proces. Zwjazkowy kancler Olaf Scholz (SPD) bě do srjedźišća swojeho wólbneho boja stajił, minimalnu mzdu zwyšić.
Bjezposrědnje do posedźenja knježerstwa běchu ze stron CDU/CSU na tym dwělowali, zo wyša mzda chudobje w Němskej woprawdźe zadźěwa. „Wyše płaćizny zwyšenja w niskich mzdowych skupinach hnydom zaso nadproporcionalnje zežeru“, rjekny socialna politikarka CDU Mareike Wulf nowinarjam.
Naročny projekt plahowanja je so w Južnej Africe radźił. Wón měješe zaměr, wutupjenu družinu quagga – měšeńcu konja a cebry – zaso wožiwić. Je to poddružina cebry bjez smuhow. Lěta 1883 wotemrěty quagga słušeše něhdy do typiskeho wobraza južnoafriskich stepow. Ze zaměrnym plahowanjom su wot lěta 1987 spytali družinu wožiwić. Mjeztym maja jich něhdźe 200 zwěrjatow.
Ludźi wobćežowace dźiwje swinjo je so na stanowanišću Boek nad jězorom Müritz wo zasadźenje policije postarało. Wone bě tak njemdre, zo dyrbješe swójba před nim ćeknyć. Wšitke pospyty, je z wołanjom, hałzami abo gestami wuhnać, zwrěšćichu. Tuž so zastojnicy rozsudźichu skoćo zatřělić. Po prěnich wutřělach ze słužbneje pistole zranjene dźiwje swinjo do rohodźe ćekny. Hajnik z psom dyrbješe na to za nim pytać.
Dakar (dpa/SN). Zwjazkowy prezident Frank-Walter Steinmeier Europu a Afriku namołwja intensiwnišo hromadźe dźěłać. „Najebać wšitke rozdźěle dyrbimy puć k wušemu a płódnišemu zhromadnemu dźěłu namakać“, rjekny Steinmeier wčera w senegalskej stolicy Dakaru. Wuraznje witaše wón plany kraja, swójsku produkciju šćěpiwa pře koronawirus natwarić a tak afriske kraje zastarać. Dotal je Senagal runja dalšim krajam Afriki na importy pokazany.
Krej darić měł dźěłowy čas być
Gelsenkirchen (dpa/SN). Krejdarowanska słužba Němskeho čerwjeneho křiža (DRK) so za to zasadźa, zo zjawni dźěłodawarjo darowanje kreje jako dźěłowy čas připóznawaja. „To by nam jara pomhało“, zdźěli rěčnik DRK powěsćerni dpa składnostnje 70. róčnicy wobstaća darowanskeje słužby. Tuchwilu je w Němskej dosć darićelow, w lětnim dowolowym času pak składy kreje widźomnje woteběraja. Krej darić traje z trěbnym wotpočinkom něhdźe hodźinu.
Wobraz wuchoda polěpšić
Berlin/Moskwa (dpa/SN). Němska, USA a Francoska připóznaće samopostajeneju ludoweju republikow Donjeck a Luhansk na wuchodźe Ukrainy přez ruskeho prezidenta Wladimira Putina raznje zasudźeja a připowědźeja sankcije. Zwjazkowy kancler Olaf Scholz (SPD), prezident USA Joe Biden a francoski prezident Emmanuel Macron běchu sej w rozmołwje přezjedni, zo jedna so wo jasne ranjenje Minšćanskeho měroweho zrěčenja za wuchodnu Ukrainu, rěčnik zwjazkoweho knježerstwa Steffen Hebestreit wčera wječor zwurazni. Tale kročel njewostanje bjez wotmołwy, wón rjekny.
Putin bě wčera ludowej republice Donjeck a Luhansk w narěči oficialnje jako njewotwisnej stataj připóznał a ze zastupnikomaj wobeju kónčin prěnje zrěčenja wotzamknył. W nich je mjez druhim zakótwjene, zo smě Ruska w republikomaj wojerske zepěranišća wudźeržować. Tam zaměstnjeni ruscy wojacy maja wobydlerjow před nadpadami ukrainskeje armeje škitać.
Mnichow (dpa/SN). Tójšto tuchwilu wužiwanych testow koronawirusa častodosć infekciju čłowjeka z wirusowej wariantu omikronom njespóznawa. To je skupina slědźerjow wokoło Mnichowskeho wirologi Olivera Kepplera z Ludwiga Maximiliansoweje uniwersity zwěsćiła. Testy dotalnu wariantu delta lěpje spóznawaja hač omikron, rěka w rozprawje fachoweho magacina „Medical Microbiology and Immunology“. „Nichtó njesmě negatiwny testowy wuslědk za garantiju měć“, Keppler warnuje. Runje w žołmje omikrona su po jeho měnjenju škitne naprawy, kaž wotstawk dodźeržeć a nahubnik wužiwać, wažne.
Testować ludźi bjez symptomow skići w aktualnym połoženju skerje jebacu wěstotu a nima po słowach Kepplera wjele zmysła. Lěpje je, při symptomach z wobmjezowanjom kontaktow z dobrymi antigenowymi testami dźěłać. Za to měła so jara spěšnje lisćina najspušćomnišich testow zestajeć a wozjewić – w Němskej je jich mjeztym 580. Tak móhli „slepe testy“ identifikować, Keppler měni.
Berlin (dpa/SN). Hladajo na dale a mjenje fachowcow w Němskej je so zwjazkowy minister za hospodarstwo Robert Habeck (Zeleni) za to wuprajił, zo dyrbjeli ludźo składnosć dóstać tež po docpěću rentnarskeje staroby dlěje dźěłać móc. Habeck rjekny nowinarjam, zo měło so to na dobrowólnym zakładźe stać. Tajke fleksibelne dlěše dźěło by so dwójce wudaniło: Štóž chce, móže swoju wědu, swoje zamóžnosće a swoje nazhonjenja towaršnosći přewostajić. Z toho bychu zawody a towaršnosć profitowali. „Runočasnje činimy něšto přećiwo njedostatkej fachowych mocow“, Habeck zwurazni. Zastup do renty měł so w časowym woknješku stać, nic na krutym terminje.