Berlin (dpa/SN). Dobry tydźeń do přichodneje konferency ministerskich prezidentow je zwjazkowy minister za strowotnistwo Karl Lauterbach bórzomne zběhnjenje wobmjezowanjow koronawirusa dla připowědźił. „Myslu, zo móžemy jasnje do jutrow wolóženjam přizwolić“, rjekny politikar SPD nowinarjam. Tuchwilu by pak za to hišće přezahe było. 16. februara je přichodne wuradźowanje Lauterbacha z krajemi planowane.
Starosća so namocy dla
Berlin (dpa/SN). Zwjazkowa nutřkowna ministerka Nancy Faeser (SPD) starosća so přiběracych politisce motiwowanych namócnosćow přećiwo politikarjam dla. Po aktualnych ličbach Zwjazkoweho kriminalneho zarjada su namócnosće přećiwo politisce zamołwitym wo 200 procentow přiběrali. To pokazuje po jeje słowach přiběracu hrubosć a zacpěwanje stata a demokratije. Faeser chce so wo to postarać, zo so w socialnych medijach dlěje hidu a teorije zapřisahanja nješěrja.
Nuzowy staw w stolicy
Washington. Před pozadkom konflikta Ukrainy dla je so zwjazkowy kancler Olaf Scholz (SPD) dźensa do USA podał, hdźež wočakowaše jeho prezident Joe Biden. Dwaj měsacaj po swojim spřisahanju je to zdobom nastupny wopyt Scholza w USA. Do swojeho wotlěta do Washingtona je Scholz w sćelaku ARD hišće raz wotpokazał, brónje do Ukrainy dodawać. Wón chcył ameriskemu prezidentej hišće raz potwjerdźić, zo je Němska najswěrniši partner USA w Europje.
Wopyt zwjazkoweho kanclera je zazběh diplomatiskeje ofensiwy. Přichodny tydźeń chce so Scholz do Kijewa a po tym do Moskwy podać. Do toho je hišće zetkanje ze statnymi a knježerstwowymi šefami baltiskich krajow w Berlinje planowane. Nimo toho chcetaj francoski prezident Emmanuel Macron a pólski prezident Andrzej Duda k rozmołwam wo krizy na Ukrainje do Berlina přijěć.
Hišće dźensa chcyše so Macron na puć do Moskwy k prezidentej Wladimirej Putinej podać. Wobaj běštaj minjene dny wospjet telefonowałoj.
Frankfurt (dpa/SN). Z prěnimi konkretnymi wobzamknjenjemi je so sobotu třeća synodalna zhromadźizna k ponowjenju katolskeje cyrkwje w Němskej zakónčiła. Předsyda Němskeje biskopskeje konferency Georg Bätzing hódnoćeše tři dny trajace zetkanje w Frankfurće nad Mohanom jako „wulki wuspěch“.
Konkretnje su wobzamknyli, zo maja wěriwi biskopstwow přichodnje wjetši wliw při powołanju noweho biskopa. Nimo toho wuprajichu so za to, homoseksualne pory žohnować, ženjenym duchownym dźěło zmóžnić a žony na diakonow wuswjećić. Jasnje wuprajichu so delegaća za změnu cyrkwinskeho dźěłoweho prawa. Tuchwilu hroža sobudźěłaćerjam cyrkwinskich institucijow w padźe dźělenja mandźelstwa dźěłoprawniske konsekwency, w najhóršim padźe pušćenje. Dotal je njejasne, kak bamž Franciskus na wobzamknjenja reaguje. Minjeny čas běchu z Vatikana skerje kritiske signale słyšeć byli.
Karantena muža koronawirusa dla je w Drježdźanach zasadźenje wohnjoweje wobory zawiniła. Susodźa běchu policiju a wohnjowu woboru wołali, po tym zo běchu muža na třěše wjaceswójbneho domu wuhladali. Wohnjowym wobornikam na wjerćatym rěblu wón rozłoži, zo je tuchwilu w karantenje a zo chcyše na čerstwy powětr, bjez toho, zo by někoho wohrozył. Tuž je na třěchu zalězł.
Swětowy rekord nastupajo NDRski „Trabant“ je wotnětka oficialnje zaso w Zwickauwje. Pjeć měsacow po tym, zo bě so spočatk septembra 20 młodych žonow do zeleneho Trabanta 601 tłóčiło, su fachowcy rekord nětko oficialnje připóznali. Prěni rekord ze 17 wosobami běchu 1976 w Zwickauwje nastajili. Před lětomaj dźěše titul do braniborskeho Altlandsberga z 18 ludźimi. Wot toho časa su w Zwickauwje za nowy rekord zwučowali.
Peking (dpa/SN). Ruska chce wosrjedź napjatosćow ze zapadom Chinje wjace zemskeho płuna dodawać. Prezident Wladimir Putin a chinski statny a stronski šef Xi Jinping staj dźensa w Pekingu nowe zrěčenje připowědźiłoj. Tak dóstanje China dźesać miliardow kubiknych metrow płuna wob lěto. Putin je dźensa w Pekingu tež na zahajenju Olympiskich zymskich hrow. Poćahi mjez Ruskej a Chinu su po jeho słowach „bjez přikłada“.
Unija SPD přesćahnyła
Berlin (dpa/SN). Unja CDU/CSU je SPD po zwěsćenju sćelaka ARD w nahladnosći ludźi prěni króć po měsacach zaso přesćahnyła. Bychu-li njedźelu wólby zwjazkoweho sejma byli, by SPD 22 procentow dóstała, štyri procenty mjenje hač tydźenja. Unija móžeše so wo štyri procenty polěpšić a ma 27 procentow. Zeleni maja dale 16 procentow, Lěwica pjeć. FDP je wo jedyn dypk na dźesać procentow spadnyła. AfD je so wo jedyn dypk na dwanaće polěpšiła.
Roth: Agresiwny akt
Berlin (dpa/SN). Po připowědźenym zběhnjenju prawidła 2G we wobchodach Schleswigsko-Holsteinskeje žadaja sej politikarjo koalicije a opozicije, tajku kročel po wšej Němskej přesadźić. Předsyda FDP Christian Lindner praji w telewiziji RTL, zo načinja prawidło 2G wjele škody, bjez toho zo by něšto k přewinjenju pandemije přinošowało. „Tuž 2G we wikowanju hižo njetrjebamy, škitny nahubnik pak na kóždy pad.“ 2G rěka, zo maja jeničce šćěpjeni a wustrowjeni přistup.
Předsyda CSU Markus Söder je sej wěsty, zo z nahubnikom prawidło 2G hižo njetrjebamy. W hosćencach móhli 2G wobchować, ale bjez přidatneho testa. „Trjebamy nětko spočatk kónca naprawow. Sćěna omikrona tu hišće je, ale spóznawamy hižo durje, přez kotrež móžemy hić“, rjekny wón sćelakej RTL.