Mylnje z přepytowanskeho jastwa pušćili su w Londonje pozdatneho seksualneho skućićela. Policija nětko intensiwnje za 24lětnym pyta, rěčnik zdźěli. Prawdźepodobnje běchu jeho zaměnili. Muža běchu w aprylu 2020 splažneho nadpada, zbudźenja zjawneho hněwa a wobsydstwa drogow dla zajeli. Wot toho časa sedźeše wón w přepytowanskej jatbje. Zamołwitym je wěc „njesměrnje fatalna“.
Při přestajenju 2 000 časnikow britiskeho parlamenta na lětni čas su časnikarjo domu prominentnu pomoc dóstali: Předsyda Delnjeje komory Lindsay Hoyle je jim wosobinsce pod pažu přimnył a časniki z ruku na nowy čas nastajił. Wšako nochce, zo so zapósłancy na wopak nastajene časniki powołuja, hdyž přepozdźe na posedźenja přińdu. Třo domowi časnikarjo trjebaja normalnje 24 hodźin, časniki po cyłym domje přestajić.
Podstupim (SN/JaW). Braniborska chce wjacerěčnosć w kraju zesylnić. Za to ma tamniše knježerstwo koncept wo wjacerěčnosći zdźěłać. To je Krajny sejm Braniborskeje wčera z někotrymi hłosazwdaćemi wobzamknył.
Brüssel (dpa/SN). Čłonske staty Europskeje unije chcedźa tempo šćěpjenja přećiwo koronawirusej skónčnje pospěšić. Za to wočakuja přichodne tři měsacy widźomnje wjace šćěpiwa, kaž je prezidentka komisije EU Ursula von der Leyen wčera na widejowym wjeršku připowědźiła. Na wirtuelnym schadźowanju wuradźowachu nimo toho wo stykach EU k Turkowskej a porěčachu z prezidentom USA Joewom Bidenom, kiž bě nachwilnje internetnje připinjeny.
Awstriska dóstanje wjace seruma
Brüssel (dpa/SN). Awstriska je ze swojim žadanjom, serum přećiwo koronawirusej w Europskej uniji přerjadować, najprjedy raz zwrěšćiła. Statni a knježerstwowi šefojo EU na swojim wčerawšim widejowym wjeršku potwjerdźichu, zo chcedźa dotalny system rozdźělowanja wotpowědnje ličbje wobydlerjow wobchować. Po hodźiny trajacym rozestajenju so skónčnje dojednachu, Awstriskej „w duchu solidarity“ dźesać milionow dozow šćěpiwa přidatnje přewostajić.
Juristiske wobmyslenja
Berlin (dpa/SN). Zwjazkowe knježerstwo je swoju próstwu na cyrkwje, so jutrownych prezencnych Božich słužbow wzdać, cofnyło. Zwjazkowy nowinarski zarjad je wčera nowu wersiju wobzamknjenjow Zwjazka a zwjazkowych krajow rozesłał, w kotrymž kompletny wotrězk k dotal planowanemu „jutrownemu měrej“ pobrachuje. Tak wotpadnje tež dotalna sada: „Zwjazk a kraje proša nabožne zjednoćenstwa, zhromadźowanja jenož hišće wirtuelnje přewjesć.“
Namołwa, so prezencnych Božich słužbow wzdać, bě w katolskej kaž tež ewangelskej cyrkwi zadźiwanje a njezrozumjenje zbudźiła. Zwjazkowy nutřkowny minister Horst Seehofer (CSU) bě próstwu kritizował. Wón bě so dźiwał, zo runje strona z „C“ w swojim mjenje tajke žadanje staja.
Berlin (dpa/SN). Po lěta trajacej diskusiji je zwjazkowy sejm wobzamknył lobbyjowy register zawjesć. Zakoń, kiž su wčera wječor schwalili, zawjazuje profesionalnych zastupjerjow zajimow, do zjawnje přistupneho registra so zapisać a podać, za koho dźěłaja. Tak chcedźa přichodnje jasnišo dokumentować, štó je politiske rozsudy a zakonjedawstwo wobwliwował. Zapósłanc CDU Patrick Schneider rjekny, zo njeje zastupnistwo zajimow zasadnje špatne, zo pak měło transparentnje dokumentowane być. Štóž prawidła njedodźerži, dyrbi hač do 50 000 eurow pokuty płaćić. Register ma digitalnje předležeć.
Opozicija nima wot wulkeje koalicije wujednane prawidła za dosahace. Tež organizacija Transparency International widźi wulke njedostatki. „Njezmějemy tež dale žanu transparencu wo konkretnym lobbyjowym dźěle abo jenož jara snadnu“, praji šef němskeje wotnožki organizacije Hartmut Bäumer.