Wuradźuja wo zastajencach
Tel Aviv (dpa/SN). Israelski wójnski kabinet je so wčera wječor k wuradźowanjam nastupajo prócowanja wo pušćenje dalšich zastajencow z Gazaskeho pasma zhromadźił. Po njewobkrućenych informacijach medijow je Katar dalši namjet za dojednanje předpołožił: Hamas chce wšitkich zastajencow pušćić, hdyž israelske wójsko Gazaske pasmo dospołnje wopušći. Nawodnistwo Hamas by so w tymle padźe do eksila podało.
Popłatk w hladarnjach přiběra
Berlin (dpa/SN). Najebać statnu podpěru dyrbja wobydlerjo starownjow a hladarnjow dale a wjace pjenjez ze swójskeje kapsy přinošować. 1. januara žadachu sej za prěnje lěto w hladarni w cyłoněmskim přerězku 2 576 eurow měsačnje přidatnje, 165 eurow wjace hač spočatk 2023, kasy zdźěleja. Pomocne přiražki stata – kotrež z dlěšim přebywanjom w hladarnjach přiběraja, su so samsny čas tohorunja zwyšili.
Wegner swój poćah zakituje
Warnuje před prawicarjemi
AfD na wuchodźe dale prědku
Israelej wumjetuja morjenje ludu
Den Haag (dpa/SN). Israel dyrbi so prěni króć wumjetowanja ludomordarstwa dla před Mjezynarodnym sudnistwom w Den Haagu zamołwić. Dźensa su před najwyšim sudnistwom UNO w Den Haagu brizantne jednanja Gazaskeje wójny dla zahajili. Južna Afrika bě Israel 2023 wobskoržiła, dokelž ma wojersku namóc přećiwo ciwilnej ludnosći w Gazaskim pasmje za ranjenje konwencije UNO přećiwo morjenu ludow. Israel wumjetowanje raznje wotpokazuje. Sudnistwo ma konflikt mjez krajomaj rozrisać.
Sudnicy chcychu dźensa najprjedy raz wo nuznej skóržbje Južneje Afriki rozsudźić. W njej sej žadaja, wojerske zasadźenje w Gazaskim pasmje hnydom skónčić. Južna Afrika a Israel stej z delegacijemi prawniskich fachowcow do Den Haaga přijěłoj. Dźensa měješe Južna Afrika składnosć, swoje argumenty přednjesć, jutře Israel. Němska je měnjenja, zo njeje wotpohladane morjenje ludu ze stron Israela dopokazane. Zastupnicy prawicarskich stron w Israelu sej mjeztym žadaja, Gazaske pasmo „wotpalić“.
Ratarjo na rozmołwu prošeni
Amplowa koalicija reaguje na protesty – 4 000 traktorow w Drježdźanach
Berlin/Choćebuz (dpa/SN). Hladajo na dale trajace protesty ratarjow su předsydźa třoch amplowych frakcijow w zwjazkowym sejmje nawodow ratarskich zwjazkow za přichodnu póndźelu na rozmołwu přeprosyli. Wotpowědny list frakciskeho předsydy Rolfa Mützenicha (SPD), Britty Haßelmann (Zeleni) a Christiana Dürra (FDP) su wčera rozesłali, powěsćernja dpa rozprawja. W rozmołwje chcedźa mjez druhim wo hospodarskich perspektiwach ratarskich zawodow w Němskej rěčeć.
Amplowa koalicija SPD, Zelenych a FDP je ze swojimi planami nastupajo šmórnjenje ratarskich dawkowych lěpšinow za agrarny diesel wichor protesta zbudźiła, kotryž tež po poskićenych kompromisach knježerstwa womjelknył njeje. Tuchwilu wotměwa so akciski tydźeń, kotryž ma swój wjeršk přichodnu póndźelu w Berlinje dožiwić. Samsny dźeń maja so tež rozmołwy z frakciskimi šefami wotměć.
Lauterbach: Preč z homeopatiju
Berlin (dpa/SN). Zwjazkowy minister za strowotnistwo Karl Lauterbach nochce homeopatiju wjace přez zakonske chorobne kasy financować. „Homeopatija nima jako popłatk kasow žadyn zmysł“, piše politikar SPD internetnje. „Zakład našeje politiki ma wědomostna samozrozumliwosć być. Změnu klimy tež z kuzłotnym prućikom njezadźeržimy.“ Zakład homeopatiskeho lěkowanja su rostlinowe, mineraliske abo zwěrjeće maćizny, kotrež pacient na přikład w formje małych kulkow (globuli) dóstanje. Wědomostnicy su sej přezjedni, zo njeje pozitiwny wuskutk homeopatiskeho lěkowanja dopokazany, kiž efekt placebo přesahuje.
Kaž časopis Spiegel rozprawja, je ministerstwo Lauterbacha tamnym ministerstwam doporučenje rozesłało, w kotrymž móžnosće lutowanja w chorobnych kasach naliča. W dokumenće mjez druhim rěka: „Posłužby, kotrež nimaja žadyn lěkarsce dopokazany wužitk, njesměmy dlěje z přinoškow financować. K tomu słušeja homeopatiske lěkowanja.“ Lauterbach bě hižo w oktobru 2022 namjetował, homeopatiju šmórnyć.
To a tamne (11.01.24)
Z kradnjenymi wěcami na sankach je policija dweju muži na němsko-čěskim pomjeznym přechodźe w rudnohórskim Oberwiesenthalu lepiła. Při kontroli sankow namakachu zastojnicy sněhakowarske škórnje, motorowu piłu, laptop a powětrowku. Wěcy běchu samsny dźeń z jednoswójbneho domu pokradnyli, policija zwěsći. Policija nětko pruwuje, hač staj mužej w starobje 33 a 35 lět za dalše padustwa w Oberwiesenthalu a wokolinje zamołwitaj.
Do rěki Seine skočić chce Pariska měšćanostka Anne Hidalgo. Po tutym puću chce wona dopokazać, zo je so kwalita wody w rěce minjene lěta zasadnje polěpšiła. Kupanje w Seine je hižo sto lět zakazane, dokelž je rěka wopłóčkow dla zanjerodźena. W přihotach na Olympiske hry su wjele pjenjez nałožili, zo bychu kwalitu wody tež za wubědźowanja zwyšili.
Rozdźělne reakcije
Berlin (dpa/SN). W amplowej koaliciji reaguja rozdźělnje na najnowše namjety ministra za strowotnistwo Karla Lauterbacha (SPD) nastupajo lěpše lěkarske zastaranje. Mjeztym zo žada sej SPD spěšne přesadźenje planow, jewja so w rjadach frakcije FDP w zwjazkowym sejmje žadanja za lěpšim płaćenjom tež fachowych lěkarjow. Namjety Lauterbacha su „trěbny zakład nuznych zakonskich změnow“, frakcija zdźěla. Lěpje zapłaćić pak měli so wšitke lěkarske wukony.
Minister na rak schorjeł
Washington (dpa/SN). Po dny trajacych tukanjach wo swojim strowotnym stawje je zakitowanski minister USA Lloyd Austin zdźělił, zo je na rak prostaty schorjeł. Tumor su sčasom zwěsćili, tuž su wuhlady na wuhojenje jara dobre, přisłušna chorownja zdźěla. Komplikacijow po prěnjej operaciji dla dyrbi Austin znowa do chorownje. Běły dom informacisku politiku šefa Pentagona kritizuje: W USA je z wašnjom, zjawnosć běžnje wo strowoće wodźacych politikarjow informować.
Wójsko přećiwo cwólbam
Tež w Choćebuzu su ratarjo póndźelu we wobłuku cyłoněmskeje ...
Diplomatiska misija Baerbock
Beirut (dpa/SN). Wonkowna ministerka Annalena Baerbock hladajo na přiběrace napjatosće w konflikće mjez Israelom a milicu šiitow Hisbollah w Libanonje ze swojej diplomatiskej misiju na Bliskim wuchodźe pokročuje. Dźensa je so politikarka Zelenych w stolicy Beiruće pola wobkedźbowanskeje misije UNO wo aktualnym połoženju informowała. Po spočatku wójny mjez Israelom a islamistiskej Hamas w Gazaskim pasmje 7. oktobra 2023 rozestajenja mjez Israelom a Hisbollah w Libanonje w pomjeznej kónčiny wobeju krajow spochi přiběraja. Hisbollah a Hamas stej zwjazkarjo.
Wčera bě so Baerbock při wopyće egyptowskeho pomjezneho přechoda Rafah dospołnje zludana wo humanitarnym połoženju ciwilneje ludnosće w Gazaskim pasmje wuprajiła a sej hnydomnu pomoc ze stron Israela žadała.
