Z wudaća: srjeda, 19 oktobera 2016

Budyšin (Łu/SN). Wutoru běštaj žurnalist Dirk Gieselmann a fotograf Armin Smailović z Berlina po Budyšinje po puću, pytajo­ za wotmołwami: Čeho so ludźo w dźensnišich politiskich wobstejnosćach w zwisku z požadarjemi azyla poprawom boja? Wosebje žurnalistow zajimowaše, što zastupjerjo narodnych mjeńšin w Němskej strachuje. Tohodla naprašo­wa­­štaj so najprjedy pola Serbow. Po rozmołwje z Jurjom Łušćanskim podaštaj so wobaj do Kamjentneho domu a rěčeštaj ze zamołwitym za młodźinsku kulturu Renom Rösselom, kotryž jimaj zdobom tež skutkowanje domu předstaji. Tam wužiwaštaj składnosć, so tež wyšeho měšćanosty Alexandera Ahrensa (njestronjan) woprašeć, kotryž běše na wuradźowanju w domje. „Atlas­ stracha“ je titul přinoška magacina w Berlinskim nakładnistwje Dummy, kotryž kwartalnje wuchadźa.

Dźens před 25 lětami załožichu knježerstwa Zwjazka, Sakskeje a Braniborskeje we Łazowskej cyrkwi Załožbu za serbski lud. Wona měła k tomu přinošować, zo móža Serbja „swoju rěč, swoju narodnu a kulturnu identitu tež w přichodźe zdźeržeć“. Tak rěkaše w zhromadnym wozjewjenju zwjazkoweho ministerstwa nutřkowneho a ministerskeju prezidentow Sakskeje prof. dr. Kurta Biedenkopfa a Braniborskeje dr. Manfreda Stolpe wo wutworjenju załožby. Wona dósta 34 milionow hriwnow, za lěto 1991 a za 1992 41 mio. hr. „Chcemy sobu k tomu přinošować, zo móhli so Serbja w přichodźe swobodnje a bjez zadźěwkow w swójskej kulturnej swojoraznosći wuwiwać“. Tole wuzběhny w narěči zwjazkowa ministerka za žony a młodźinu dr. Angela Merkel, kotraž zastupowaše zwjazkowe knjeržerstwo na historiskim akće. Załoženske wopismo podpisachu zwjazkowy statny sekretar Franz Kroppenstedt, prof. dr. Kurt Biedenkopf a dr. Manfred Stolpe. Za předsydku załožboweje rady wuzwolichu Ludmilu Budarjowu. Manfred Laduš