K zakónčenju sezony duchowneje hudźby wuhotuje katolski tachantski chór pod nawodom cyrkwinskeho hudźbneho direktora Friedemanna Böhmy stajnje koncert, pak pod wosebitej tematiku pak z wobšěrnym oratorijom. Minjenu njedźelu rěkaše wosebity poskitk „Magnifikat“.
Budyšin (CRM/SN). „Cyła wosobina Marije so w tymle chwalospěwje wotbłyšćuje. Wón je takrjec wobraz maćerje Božeje“, rozłoži tachantski farar, prelat Wito Sćapan, poćahowacy so na słowa Benedikta XVI. z lěta 2005. „Magnifikat“ spěwaja tež katolscy Serbja nimale na kóždym nyšporje. Chwalospěw Marije pak komponuja wuměłcy hižo přez lětstotki tohorunja do wšelakich formow. Tak sćěhowaše tež sobu najpopularniši cyrkwinski komponist našich dnjow w Jendźelskej John Rutter (nar. 1945) dołhu tradiciju, słowa chwalby Boha wuměłsce z hudźbu zwjazać. Při tym da so inspirować wot „wjesołych marijanskich swjedźenjow we łaćonskoameriskich kulturach“. Wosebitosć tohole stila začuwachu připosłucharjo tež nětko w Budyšinje.