Budyšin (SN/JaW). Delany stejachu wčera wječor w srjedźišću zarjadowanja we wobłuku lětušeje čitanskeje turneje Ludoweho nakładnistwa Domowina w Smolerjec kniharni. Tam je lektorka LND Katrin Čornakec zhromadnje z awtorom Pawołom Rotu nowostku „Z kameru a pisakom po Delanach“ předstajiła. Zwjazanosć z kónčinu a zajim na njej mnohich we a wokoło Budyšina bydlacych wotbłyšćowaše so w mnoholičbnym wopyće.

„Pawoł Rota je hižo wjacore wobrazowe zwjazki wudał, tola tež jeho teksty sej knihu zasłužeja“, wobkrući Čornakec wudaće knihi. Wona spomni dale na to, zo bě Ralbičan něhdźe 300 přinoškow wo Delanach wozjewił a samo basnił, štož awtor sam pospyty mjenowaše. „Zo su mje w nowinach poet mjenowali, je tróšku wjele česće“, Rota z posměwkom měnješe. Za knihu, kotraž je jako čitanka zestajana, su z jeho přinoškow połsta wuzwolili.