Choćebuz/Budyšin (SN/MiR). Stawizny Serbskeho instituta su hódne wobšěrneje zaběry. Wo tym swědči aktualna dźěłowa rozprawa wo lětomaj 2015 a 2016. Před lětomaj bě prěnja tajka wušła. Za wulki publikum myslena bro­šurka bě wažny krok k polěpšenju zjawneho dźěła a bu derje přiwzata. „To bě přičina za nětčišu aktualnu dźěłowu rozprawu, kotraž bu rozšěrjena z historiskim zhladowanjom na wjace hač šěsć lětdźesatkow slědźenja na polu sorabistiki. Tónle nadawk přewzał je dr. Friedrich Pollack“, rjekny dr. Anja Pohončowa na předstajenju publikacije kónc oktobra­ w Choćebuzu.