Kamjenc (SN/mwe). „Město Kamjenc 80. narodniny Georga Baselitza wysoko hódnoći. Wjeselimy so, zo wón z našeje wokoliny pochadźa, zo ma tu swoje korjenje.“ Takle witaše wčera nawječor Kamjenski wyši měšćanosta Roland Dantz (njestronjan) hosći, mjez nimi bratra Baselitza Güntera Kerna na wotewrjenje fotoweje wustajeńcy „Im Kern Baselitz“ na nutřkownym dworje radnicy. Dwě lěće bě Kamjenski fotograf Reinhard Kärbsch z dźěćimi a młodostnymi po „Baselitzowej šćežce“ při Němskopazličanskim wulkohaće na slědach jednoho z najwuznamnišich molerjow swěta a našeho časa po puću. Dźěl jeho zapopadnjenych motiwow móža sej zajimcy hač do 6. měrca w Kamjenskej radnicy wobhladać. Kärbsch ma swoju wustajeńcu za „hommage na Baselitza“ a chce twórby z Němskich Pazlic pochadźaceho a ze swójbnym mjenom Kern rěkaceho „na lochke wašnje spřistupnić“. Tuž je dźěći „wopak wokoło“, na žerdźi bimbolace so z hłowu k zemi, fotografował. Tak kaž je tež Baselitz swoje mólby „na hłowje stejace“ tworił.