Domowina sej přeje, zo měł Muzej Ćišinskeho lěpje přistupny być
Budyšin (SN/mwe). Muzej najwuznamnišeho serbskeho basnika a klasikarja Jakuba Barta-Ćišinskeho je tuchwilu w předchěži Šule Ćišinskeho w Pančicach-Kukowje zaměstnjeny. Wjele lět bě so wo njón horliwy serbski wučer a prócowar Jurij Bětnar starał. Po nim so Kuringec mandźelskaj Trudla a Alfons z wulkim angažementom za to zasadźowaštaj, zo bě muzej šulskim rjadownjam a mnohim dalšim zajimcam tež z wukraja prawidłownje přistupny, a wodźeštaj jich po wustajeńcy. Wšelakich přičin dla pak to hižo móžno njebě. Na spožčenju Myta Ćišinskeho basnikej Benediktej Dyrlichej 15. oktobra 2011 w Pančicach-Kukowje žadaše sej tehdyši předsyda Zwjazka serbskich wuměłcow w swjedźenskej narěči „natwar Narodneho literarneho muzeja Ćišinskeho (po přikładźe Lessingoweho muzeja) w twarjenju zawrjeneje srjedźneje šule w Pančicach“.
