Chwalospěwy w Pančicach-Kukowje a dujerjo w Budyšinje rjad zakónčili
Budyšin/Pančicy-Kukow (SN/bn). Z tradicionalnej „swjedźenskej wěžowej hudźbu“ stej wčera wječor kwintetaj Musica con spirito z Drježdźan a Budyscy měšćanscy dujerjo 13. łužiske hudźbne lěćo w Budyšinje zakónčiłoj. Prěni dźěl koncerta wuhotowaštej cyłkaj na Hłownym torhošću a na wěži radnicy. Něhdźe 300 wopytowarjam předstajichu hudźbnicy twórby w 17. lětstotku w sprjewinym měsće skutkowaceho komponista Johanna Christopha Pezela. We wotměnje zaklinčachu barokne zynki raz z wěže, raz z torhošća. Druhi dźěl prezentowachu woni zdźěla zhromadnje hudźo před radnicu. Program wopřiješe kompozicije z časa wot zažneho baroka hač do 20. lětstotka. Mjez druhim zaklinčachu „The Earle of Oxford’s March“ Williama Byrda, „Mała wěžowa hudźba“ Ferenca Farkasa a „Music for Brass“ Klausa-Petera Bruchmanna. Wjeršk bě kedźbyhódna adapcija wujimkow z baleta „Jězor kołpjow“ Pjotra Čajkowskeho, kotruž bě čłon Budyskich dujerjow Torsten Förster spisał.