Róži Domašcynej Sakske literarne myto spožčili

Wojerecy (SN/bn). Sakska literarna rada je lětsa Róži Domašcynej Literarne myto ministerstwa za wědomosć a wuměłstwo Sakskeje připóznała. We wobkrućenju jury mjez druhim rěka, zo wuznamjenja ju za „samozrozumliwu wuměnu mjez serbšćinu a němčinu, mjez lyriku a prozu, ironiju a nutrnosću, chutnosću a hru. Wona pokazuje fantastiske wuměłstwo ze słowom, jeje teksty přeswědčeja z originelnymi wobrazami, poetiskimi zynkami a dificilnymi skradźnymi myslemi. Kritisce wobkedźbuje wona přewróty na łužiskich wsach – w małym wotkrywa cyły swět.“ Wčera přepoda ministerka dr. Eva-Maria Stange (SPD) serbskej basnicy z 10 000 eurami dotěrowane myto na žurli „Vis-à-vis“ we Wojerecach.