Kulturny konwent wustawki přiměrił a spěchowanski plan schwalił

Zhorjelc (SN/bn). Na 112. posedźenju konwenta kulturneho ruma Hornja Łužica-Delnja Šleska wčera w Zhorjelskim krajnoradnym zarjedźe su čłonojo gremija wšitke namjety za wobzamknjenje jednohłósnje schwalili.

Po zwěsćenju wobzamknjenjakma­nosće rozjimachu přitomni financne połoženje winowatostneho zaměroweho zwjazka. Nadbytk něhdźe 200 000 eurow přeńdźe do rezerwy, kotraž wopřijima tak něhdźe 1,1 milion eurow. Předsyda konwenta, Zhorjelski krajny rada Bernd Lange (CDU), zjimaše: „Směm rjec, zo je kulturny rum derje hospodarił.“

W slědowacym dnjowym dypku su wustawki přiměrili. Ze změnu budźe tohorunja město Zhorjelc wot klětušeho dobrowólny sobustaw kulturneho ruma.