Drježdźany (SN/bn). Wosebita wustajeńca „WĆIPNOTA jedyn do štyri“ z fotografijemi Franka Höhlera, Thomasa Kläbera, Georga Krausy a Jürgena Maćija je wot dźensnišeho w Drježdźanskej Wili Eschebach přistupna. Na wčerawšej wernisaži wuzběhny lawdator dr. Michael Bittner, zo „přibližeja so tući wuměłcy, kotrymž je wažne wćipni być a wćipni wostać, swojim motiwam bjez předzajatosće. Tak hesłu wustajeńcy cyle wotpowěduja.“

W mjenje přehladku wuhotowaceje Ludoweje banki Drježdźany-Budyšin dźakowaše so nowinski rěčnik Thomas Lohse fotografam a přepoda jim wobrazowy zwjazk. Kniha wopřijima zapis wšitkich wuměłcow kaž tež wubrane přikłady jich tworiwosće z prěnich 50 ekspozicijow we Wili Eschbach. Aktualna wustajeńca je dohromady 94., k stotej ma přichodny zwjazk wuńć. W nim budu potom tež nětčiši fotografojo zastupjeni. Wotewrjenje hudźbnje wobrubiłoj staj Stefan Wehrenpfennig na gitarje a Thomas Friedländer na diwersnych instrumentach.