Čorny Chołmc (SiR/SN). Čornochołmčanska powšitkownowužitna towaršnosć Krabatowy młyn pokročuje z loni załoženym rjadom „Kulinariski wječor“. Pod hesłom „Wječorne a najlubše jědźe Awgusta Sylneho – Dźeržće hosćinu kaž něhdy sakski kurwjerch“ su zamołwići wčera w tamnišim hosćencu Dom młynka prěnje lětuše zarjadowanje toho razu wuhotowali.
Drježdźanski dźiwadźelnik Steffen Urban jako Awgust Sylny witaše cyłkownje 21 hosći, na kotrychž kulinariski kaž tež amizantny a wotměnjawy wječor čakaše. Samo jědźna karta z titulom „Kulinariski Awgust“ bě połna słódnych rěčnych překwapjenkow a wotkrywanjow.