Wučerjo-wolejbulisća Serbskeho gymnazija Budyšin (SGB) dobychu tež na druhim hrajnym dnju 52. sezony wokrjesnych mišterstwow při wysokim saku wobě partiji, a to 2:0 přećiwo Wyšej šuli Wjazońca a 2:1 přećiwo Powołanskej šuli za zežiwjenje Budyšin.
Kaž na kóncu minjeneje sezony wojuja pedagogojo-wolejbulisća SGB a kolegojo z Lubija na poslednim hrajnym dnju wo titul wokrjesneho mištra. Loni rozsudźichu serbscy hrajerjo partiju z 2:0 a chcedźa wuspěch tež lětsa srjedź meje wospjetować. Sportowy kontrahent z Pestalozzijoweje wyšeje šule ma w swojich rjadach sylneju młodeju nadběhowarjow, kotrajž měještaj dotal wulki podźěl na suwerenych dobyćach. Tak je hižo dźensa brizanca za finalne rozestajenje garantowana, kotraž budźe 15. meje w sportowni Budyskeho kubłanišća.