Zarjad Załožby za serbski lud 50 požadanjow dóstał

Budyšin (SN/mwe). Dwójce wob lěto móža jednotliwcy, towarstwa, šule, institucije a dalši pola Załožby za serbski lud próstwu wo pjenježne spěchowanje swójskich projektow stajić. Posledni połlětny termin bě njedawny 31. měrc. Kaž direktor załožby Jan Budar na naprašowanje Serbskich Nowin zdźěli, je eksaktnje 50 próstwow wo spěchowanje w załožbowym zarjedźe za lětsa dóšło. Tute ćělesa spěchuja so cyłe lěto, dla toho dóńdu jich próstwy zasadnje kónc septembra a nic hakle nětko. Někotre z nich přewjedu so w kooperaciji ze Serbskim ludowym ansamblom. Požadarjo běchu šule, towarstwa, SLA a dalši. Cyłkownje drje stej lětsa 1,2 milionaj eurow spěchowanskich srědkow k dispoziciji, ale suma je skoro wučerpana. „Móžemy rjec, zo je to wo tójšto wjace pjenjez, wo kotrež próstwarjo proša, hač mamy po tuchwilnym planowanju na lěto k dispoziciji“, Jan Budar zwěsći. K tomu wón doda, zo je nětko interna wěc, zo w załožbje za tym hladaja, kak a hač móhli wšelake srědki po datych wuměnjenjach přerjadować. Zaměr dźě je, tak wjele kaž móžno financować.