Budyšin (CRM/SN). Do wobšěrneho wuměłskeho projekta „Swětło pozbudźa“ bě tež chór Serbskeho gymnazija Budyšin zapřijaty. Sobotu do bołmončki wuhotowa wón w Budyskej tachantskej cyrkwi pod nawodom cyrkwinskeho hudźbneho direktora Friedemanna Böhme hudźbny nyšpor, w kotrymž nahladnu ličbu serbskich a němskich wopytowarjow znowa runjewon wobkuzła. Z dwěmaj dźělomaj Jana Pawoła Nageloweje „Sinfonije V – Tři modlitwy“ steješe twórba klasiskeje moderny na programje, kotraž jara wužaduje a njeje tuž wot komponista zawěsće za šulski chór myslena. W lěće 1995 bu sinfonija we Wojerowskej Janskej cyrkwi hišće w přitomnosći komponista prapředstajena. Nětko so znowa wobkrući, zo hodźi so kompozicija wulkeje hudźbneje formy, po stilu jónkrótna, swojeje nabožneje dimensije dla jako duchowny testament komponista wobhladować. Do wosebitosćow sinfonije słuša wuběr instrumentarija. Su to bijadła ze sylnym wobdźělenjom bubonow a pišćele.