ST Marijina hwězda
– SZ Motor Kumwałd 3:0 (0:0)
Zestawa domjacych: Hejduška – R. Cyž, Zelnak, Rab, R. Hawš, Šołta, Bělk (46. Pjetaš), O. Hawš, Ch. Cyž (74. Lipič), Eldor, Pakoßnick (36. Winkler)
Na třećim hrajnym dnju wokrjesneje wyšeje ligi wočakowaše koparske mustwo ST Marijineje hwězdy hosća z Kumwałda. Wot wšeho spočatka bě spóznać, zo chcychu chowancy trenarja Erwina Kleinmanna druhu domjacu hru sezony dobyć, a to so jim tež z přeswědčiwym wukonom zešlachći.
W prěnich mjeńšinach so wobaj cyłkaj najprjedy raz wobčuchaštej a suwaštej sej bul w swójskich rjadach tam a sem. Tak traješe hač do 14. min., zo mějachu domjacy prěnju wulku šansu. Po flance Richarda Hawša třěli Christoph Cyž bul z pjeć metrow na klětku, Kumwałdski škit pak jón na wrotowej liniji wotwobara. Jako so Oskar Hawš w 32. min. jara derje w srjedźnym polu přesadźi a ze zdalenosće 21 metrow na wrota třěli, prasny kulowata koža jenož do žerdźe. Swoju prěnju móžnosć mějachu hosćo šěsć mjeńšin do přestawki. Wotzamknjenje pak běše přesłabe, tak zo wrotar Fabian Hejduška z třělwu žane ćeže njeměješe.