Premjera komedije „Łapanje šefa“ z chutnej a aktualnej temu

Haslow (AW/SN). Komedija „Łapanje šefa“ w Berlinje bydlaceho awtora Thomasa Steinki měješe sobotu wječor na Haslowskej žurli před nimale sto přihladowarjemi swoju hornjoserbsku premjeru. Prapremjerne předstajenje z němskim titulom „Feindliche Übernahme“ bě 2001 w dźiwadle Altenburg-Gera. Kruch je Němsko-Serbske ludowe dźiwadło (NSLDź) hižo­ w aprylu wuspěšnje delnjoserbsce předstajiło. Sobotu přijimachu přihladowarjo ju jako prěnju hornjoserbsku inscenaciju noweje hrajneje doby 2019/2020. Wo dobry přełožk postarała bě so Lubina Hajduk-Veljkovićowa. Inscenaciju na wsach hišće dźewjeć króć předstaja.

Prjedy hač so zawěšk zběhny, poda Madleńka Šołćic, kotraž je dramaturgiju inscenacije přewzała, zawod do wobsaha a zaměra komedije, tež pokazujo na to, zo je tema hry z tuchwilu so wotměwacej strukturnej změnu jara aktualna.