Wojerecy (SR/SN). Na jubilejnym swjedźenju wočakuje kóždy wjele postrownych narěčow a skerje oficialny ramik. To wšo so někak k Wojerowskej Kulturnej fabrice njehodźi, kotraž bě přeco hižo trochu hinaša. A to je tež derje tak. Bjez wobleka a krawaty, ale z cedlku w zaku – tak je so jednaćel Kulturneje fabriki Uwe Proksch na jewišćo stupił. Krótko a jadriwje wón na to pokaza, štož bě za towarstwo hižo přeco typiske: žane wulke narěče dźeržeć, ale cyle jednorje činić. A to nětko hižo dlěje hač lětdźesatkaj. Před 25 lětami běchu Kulturnu fabriku Wojerecy w tehdyšim młodźinskim klubje „Laden“ załožili. Pozdźišo běchu rumnosće přemałe, zo móhli sociokulturu za wšě generacije dołhodobnje zaměstnić. Tak přećahnychu do něhdyšeho baloweho domu, w kotrymž běchu Domowinu dozałožili. Dodźeržany a marodny twar pak dyrbjachu nuznje ponowić, ale za to pobrachowachu pjenjezy. Tak załožichu čłonojo Kulturneje fabriki wotpowědnu iniciatiwu, zo móhli ponowjenje pjenježnje podpěrać. Před štyrjomi lětami móžeše Wojerowska Kulturna fabrika skónčnje zaso do saněrowaneho domu zaćahnyć.