MSV Budyšin 04 II – Viktoria Worklecy 1:3 (25:22, 13:25, 19:25, 14:25)
Budyšin skićeše wolejbulistam Viktorije Worklecy w zašłych lětach přeco jara ćežki plester. Tež minjenu sobotu čakaše na nich zaso komplikowana hra. Sprěnja hrajachu we wulkej Daimlerowej hali zaso prěki na małych polach, tak zo pobrachowaše Worklečanam jedna wažna bróń – skočne nadaće. Zdruha falowaše stajny přistajer Marcel Rjelka ze swójbnych přičin. Tak běše započatk hry chětro kopolaty. Njeznate běhanske puće so křižowachu, srjedźni nadběhowarjo běchu zrědka zasadźeni a stabilny Budyski blok bě derje nastajeny. Tak dóstachu Worklečenjo wjacore bule wróćo „před noze“. Hosćićeljo sej předskok wuhrachu a čujachu, zo je dobyće móžne. Nětko pokazachu tež sylne nadběhi.