Z trójnej sławu dźakowaše so wutoru wječor w Pančicach-Kukowje publikum chórej Židźino za jeho poskićenja. Wjace hač 50 wjesnjanow a čłonow Pančičanskeje Domowinskeje skupiny kaž tež wulka ličba čłonow chóra Lipa dožiwi w „Starej hospodźe“ jara lubozny a tež wotměnjawy nazymski koncert a wužada sej samo přidawk.

Pančicy-Kukow (BW/SN). Z tradicionelnej pěsnju „Ha widźu-li ptačata ćahnyć“ Handrija Zejlerja a Bjarnata Krawca měšany chór ze Židźinoho pod nawodom swojeje dirigentki Kerstin Lieder swój program zahaji. Připowědźerka Weronika Boswankowa witaše připosłucharjow w dobrej a wurazliwej serbšćinje a wjedźeše potom w serbskej a němskej rěči po programje. Wona přeradźi, zo su před dźesać lětami hižo raz w Pančicach koncertowali. Židźinski chór ze swojimi 30 čłonami je měšany chór, w kotrymž nimo wjetšiny žonow tež někotři mužojo spěwaja. A dale rjekny, zo prócuja so, wosebje tež serbske pěsnje derje přednjesć.