Měrćin Weclich z hosćimi dwójce na wupředatej žurli koncertował

Budyšin (SN/bn). Pop, rock, swing, reggae, funk, soul, šlager a mjezynarodna folklora – wšo to dožiwichu kónc tydźenja wopytowarjo koncerta „Klawěr – brewěr“ w Budyskim Kamjentnym domje. Měšeńca žanrow bě samo hišće wobšěrniša: „Jazz na zarjadowanju Měrćina Weclicha – štó by sej to myslił“, dźiwaše so iniciator, organizator a awtor bjezmała kóždeho hudźbneho přinoška kon­certa Měrćin Weclich, jako přewostaji jewi­šćo młodemu, w Salzburgu studo­wacemu pianistej Walentinej Bjedrichej. Zhromadnje z profesionalnej kapału pod nawodom tež za aranžementy zamołwiteho Drježdźanskeho docenta Malty Rogackeho zahra wón kompoziciji „Moanin‘“ a „Au privave“ Arta Blackleyja resp. Charlieja Parkera. Jenički dalši titul z takrjec cuzeho pjera bě kruch „El Choclo“ Ángela Gregorija Villoldosa we wersiji za gi­taru-solo, wirtuoznje zanjeseneho wot šulerja Serbskeho gymnazija Budyšin Matteja Hórnika. Do tohole wulěta do łaćonskoameriskeho swěta předstaji Matteo zhromadnje ze sotru Jamilu Weclichowy spěw „Sankowanje“.