Premjera činohrajneho studija „Greta“ wulki wuspěch była
Budyšin (SN/CoR). Dźesać stólcow dyrbjachu wčera wječor na małej žurli Budyskeho Dźiwadła na hrodźe přistajić, zo by 70 přihladowarjow wupředate premjerne předstajenje činohrajneho studija NSLDź „Greta“ dožiwić móhło. Choćebuski awtor hry Daniel Ratthei bě tohorunja z mandźelskej přitomny, jako su elewojo Maria-Helena Bretschneiderec, Katja Hrjehorjec a Clemens Bobka pod režiju Ralpha Hensela třeću inscenaciju jeho krucha w hornjoserbskim přełožku Lubiny Hajduk-Veljkovićoweje zwoprawdźili. Zwjetša młody publikum je so jim za to z dołhim a sylnym přikleskom dźakował. Loni spisanu hru k aktualnej tematice młodźinskeho hibanja „Fridays for future“ je Choćebuske Dźiwadło za dźěći a młodostnych Piccolo pod režiju tam jako dźiwadźelnik skutkowaceho Daniela Rattheija hakle w nowembrje na jewišćo přinjesło. Swoju prapremjeru bě „Greta“ krótko do toho w Celle dožiwiła.