Serbski Sokoł z.t. a Spěchowanske towarstwo Serbskeje wyšeje šule „Michał Hórnik“ Worklecy z.t. startujetej dźensa zhromadnje sportowu akciju třěšneho zwjazka serbskich sportowčow a sportowcow. Wona ma runočasnje socialny projekt na Worklečanskim kubłanišću podpěrać. Z Milanom Funku, starostu Serbskeho Sokoła, je so Jurij Bjeńš rozmołwjał.
W tutych kurioznych sportowych časach, w kotrychž dožiwjamy najwšelakoriše sportowe akcije z a bjez wubědźowanskeho charaktera, su so tež serbscy Sokoljo na wosebite sportowe wubědźowanje zwažili ...
M. Funka: Nam bě so dopowědało, zo je planowany sponsorowy běh na Serbskej wyšej šuli „Michał Hórnik“ Worklecy wupadnył. Tež šulski sport a z tym zwisowace šulerske wubědźowanja njesmědźa tam hižo wjacore tydźenje dołho přewjesć, a to tež w přichodnych tydźenjach směć njebudu. Tuž smy wo tym přemyslowali, kak móhli pomhać.
Čehodla zhromadny projekt Serbskeho Sokoła, třěšneho zwjazka serbskich sportowcow, ze Spěchowanskim towarstwom Serbskeje wyšeje šule „Michał Hórnik“ Worklecy?