To bě jenož wěc někotrych hodźinow. Najprjedy buchu fotografojo k obligatoriskemu terminej prošeni, zo bychu mustwowy wobraz a portrety hrajerjow zhotowili. Někotre hodźiny pozdźišo wozjewi FC Energija Choćebuz angažement noweho hrajerja za ofensiwu.
Nikos Zografakis rěka 22lětny, kiž dyrbi starosće w nadběhu FC Energije Choćebuz pomjeńšić. Grjekski allrounder hraješe w hrajnej dobje 2021/2022 w druhim mustwje VfB Stuttgart a změni w zymje k druhemu ligistej SV Sandhausen. „Wón zamóže z lěwej a prawej nohu třěleć, je spěšny a trikapołny. Runje to smy pytali. Naposledk bě wón pola SV Sandhausena. Tam drje njeměješe žanu hrajnu praksu, je pak w 2. zwjazkowej lize na najwyšim niwowje trenował. Smy wo tym přeswědčeni, zo móže wón našemu cyłkej w ofensiwje dale pomhać“, tak sportowy nawoda FCE Maximilian Zimmer.