Choćebuz (AP/SN). „Módroćišć w 21. lětstotku“ bě hesło dźěłarnički zašłu sobotu w Choćebuzu we wobłuku kreatiwneho festiwala „Stuss am Fluss“. Přeprosył bě Łužiski institut za strategiske poradźowanje, kiž podpěra zawody a zarjady w procesu strukturneje změny.

Daniel Häfner předstaji inowatiwny projekt zhotowjenja modlow za módroćišć z pomocu mobilneho labora Fablab. Kontakty bě sposrědkowała Christina Klimowa ze Serbskeho muzeja w Choćebuzu. Stare modle ze serbskimi mustrami skenuja, digitalizuja a w 3D wućišća resp. do drjewa laseruja a frezuja. Na te wašnje hodźi so zawěsćić, zo so tež w přichodźe trěbne modle za poćišćenje płatu za serbske drasty zhotowja, wšako nimaš hižo fachowcow za tute pozabyte rjemjesło. Přitomni móžachu prěnje prototypy modlow zhromadnje z wuměłču Suntje Sagerer w technice křidoćišća sami wupruwować a sej swoje nazhonjenja wuměnjeć. Na zarjadowanju wobdźělichu so tež designerki, kiž zhotowjeja modu a toboły z płatu w módroćišću.