Prěnja połserija sezony 2022/2023 krajneje klasy wuchod je nimo a prěnje mustwo SJ Chrósćicy steji tučasnje na štwórtym městnje. Po swojich 14 hrach su Chróšćenjo cyłkownje pjeć króć dobyli, pjeć króć njerozsudne hrali a trójce přěhrali. Zdobom tworja woni druhi najlěpši škit ligi. Sportowa redakcija Serbskich Nowin je so z trenarjom Pavelom Runtom a z hrajerjom Maksimilianom Zahrodnikom wo přičinach za dotalny wuspěch, kaž tež zaměrach do přichoda rozmołwjała.
Knježe Runto, kotry cil sće sebi z mustwom za hrajnu dobu 2022/2023 stajił?
P. Runt: Kaž kóždu sezonu bě tež lětsa zaso cyle jasny cil ligu dźeržeć, w kotrejž mjez tym hižo sydom lět dołho hrajemy.
Što běchu wusahowace přičiny za to, zo sće lětsa tak derje do sezony startowali?
P. Runt: Za najwažniši rozdźěl mam, zo so nětko wjace hrajerjow na woběmaj treningowymaj dnomaj wobdźěla. To je wězo z toho wida wažne, zo móžemy so tak lěpje na dypkowe hry přihotować. Zdobom móžemy potom wězo tež kmańšo wšelake taktiske předewzaća přerěčeć a hrajne formy zwučować.
Sće něšto na hrajnym systemje změnili?