Tójšto wrotow a napjate hry we Worklecach
W kopatej połnej sportowni we Worklecach wotmě so sobotu 1. halowy cup za dorostowe mustwa młodźiny E. Cyłkownje štyri towarstwa je sebi sportowa jednotka Njebjelčicy z hłownym organizatorom Robertom Lejnartom k tomu přeprosyła. Tak nastupichu přeco dwaj cyłkaj Sokoła Ralbicy Hórki, SJ Chrósćicy a SJ Njebjelčicy. Turněr wudospołnichu mustwje z Radworja a koparjo Marijineje hwězdy. Po modusu kóždy přećiwo kóždemu so dypkownje w 10 hodź. prěnja hra, wot cyłkownje 28, zahwizda. A hnydom w tutej dóstaštaj starši a tamni fanojo, mjez nimi tež zapósłanc krajneho sejma Alojs Mikławšk a jednaćel Zapadołužiskeho koparskeho zwjazka (WFV) Gojko Sinde dobry zaćišć, što halowu kopańcu wučinja. Po 8 mjeńšinach skónči so hra z njerozsudnym 1:1. Spěšne akcije, žana wostuda, napjate a zmužiće wjedźene dwuboje, emocije a kopica šansow. Wšitko to su wažne nazhonjenja, kotrež trjeba młoda koparka/młody kopar zo bych so dale a dale polěpšił/a. Mjez dźěćimi knježeše fairny wobchad a sudnicy njetrjebachu tuž docyła wulce do jednotliwych hrow zapřimnyć.