Berlin (SPC/SN). Wotewrjenje Kita Lorencoweho archiwa w Berlinskej Akademiji wuměłstwow (AdK) zahaji awtor wčera sam: Z pomocu tři lěta do jeho smjerće natočeneho wideja skići so něhdźe 80 wopytowarjam swjatočneho zarjadowanja na tute wašnje krótke, hnujace čitanje počesćeneho basnika. Po tutej retrospektiwje z pomocu techniki zawjedźe direktorka sekcije literatura AdK Kerstin Hensel do skutkowanja a žiwjenja Kita Lorenca. Swój přednošk wo „sobu najwuznamnišim serbsko-němskim poeće“ wobohaći wona z basnjemi z tohorunja wčera předstajeneje noweje zběrki basnjow „Es war nicht die Zeit“. Dosłowo k tutej w nakładnistwje Wallstein wuńdźenej knize bě bywši nakładnik a basnik Michael Krüger napisał. Zhromadnje z Róžu Domašcynej wěnowaše so Krüger na slědowacej podijowej rozmołwje wosebitosćam awtorskeho skutkowanja a tworjenja. Wotměnjejo recitowaštaj swoje najlubše němske a serbske basnje Lorenca. Byrnjež Krüger serbšćinu njerozumił, fascinuja jeho „překrasne zwuki“ basnjow w słowjanskich rěčach.