Refleksija „kołojězby po časach“ w Choćebuskim Serbskim muzeju

Turist móže so dźiwać, hdyž w Budyšinje na němskim dźělu tafle „Sorbisches Museum“ a porno tomu w Choćebuzu „Wendisches Museum“ nadeńdźe. Někotryžkuli domoródny drje móhł jemu na spokojace wašnje wujasnić, što za tym tči – wjetšina pak zawěsće nic. Ale samo ći, kotřiž móhli na wědomosć zepěrace so rozrisanje sposrědkować, budu Serbski muzej na Młynskej čo. 12, njedaloko Choćebuskeho Stareho torhošća, po wopyće z rozšěrjenej wědu wopušćić. Nomen est omen: klasicistiski něhdyši bydlenski a wikowanski dom je tež w Serbskej štwórći Choćebuza zaměstnjeny.