Budyšin (SN/bn). Serbski ludowy ansambl je na dotal wosom zarjadowanjach swojeho rjadu „Kulturna zahroda“ přerěznje něhdźe 70 wopytowarjow zličił. Najwjetši zajim zbudźi zahajacy koncert „Ladies night“ z wjace hač sto přihladowarjemi. Hanka Wowčerjowa, Weronika Kalinučcyna a Helena Hejduškec zahorichu publikum z popowymi a soulowymi baladami ze swójskeho pjera kaž tež z ada­pcijemi mjezynarodnych a serbskich hitow na přikład Měrćina Weclicha a Joan Baez. Drježdźanske trijo Placebo Flamingo zamó zajimcow z měšeńcu funka, hiphopa a rocka ze swojoraznje interpretowanymi titulemi kaž „Bei mir bistu shein“ a „Hołbik dwě běłej nóžce ma“ přeswědčić a samo k „wječornemu sportej po notach“ pohnuwać. Izabela Kałduńska na huslach a spěwarka Walburga Wałdźic stej ze swojim jewišćowym debitom jako po nimaj pomjenowane duwo z pomocu tójšto techniki mjez druhim zhudźbnjenja basnjow Miny Witkojc, skomponowane za film Grit Lemke „Pola nas rěka wona Hanka“, prezentowałoj.