Kulturna zahroda SLA z atraktiwnym hudźbnym wuměłstwom přićahuje

„Hdyž interpret so intensiwnje z twórbami zaběra a tak intelektualny přistup do jich intencije namaka, to připosłucharstwo słyši a začuwa“, tak zwurazni so komponist Jan Cyž zašłu njedźelu nawječor po koncerće na kulturnej zahrodźe Serbskeho ludoweho ansambla w Budyšinje. Młody gitarist Mateo Hórnik, kiž běše na hudźbnym gymnaziju Hród Belvedere we Weimaru před třomi tydźenjemi abiturował, prezentowaše šwarnej ličbje připosłucharjow, mjez nimi tež młodym jeho fanam, wobdźiwajomny solowy koncert. Mnozy wšak znaja jeho, kiž je w Měrkowje pola Radworja doma, hišće z jara wuspěšneho wubědźowanja młodych talentow w SLA abo z koncertowanja z Weimarskimi přećelemi w Serbskim muzeju. Nazymu nastupi wón swój studij na Weimarskej Wysokej šuli za hudźbu „Franz Liszt“. Znowa wopokaza so wón nětko jako jara talentowany a runje tak pilny wuměłc – a to cyle bjez alirow.