Lěćne dźiwadło publikum z trašiwo-amizantnym musicalom zahoriło

Budyšin (SN/bn). Wšo kaž přeco a tola wšitko hinak – tak hodźał so zazběh 27. Budyskeho lěćneho dźiwadła wčera na dworje Hrodu zjimać. Z tradicionalnym pistolowym wutřělom zahajištaj krajny rada Udo Wićaz a Budyski wyši měšćanosta Karsten Vogt (wobaj CDU) rjad předstajenjow pod hołym njebjom, wobaj prěni raz w swojim zastojnstwje. Intendant Němsko-Serbskeho ludoweho dźiwadła Lutz Hillmann, kiž bě „po 26 lětach prěni raz jako ryzy přihladowar“ přišoł, postara so na to z hišće wótřišim wupraskom z kanony takrjec wo poslednje słowo.

Něhdźe 1 000 přihladowarjow mytowaše po wupředatym premjernym předstajenju musicaloweje komedije „The Addams Family“ wukon na jewišću kaž tež za nim skutkowacych z dołho trajacym přikleskom a někotrymžkuli „brawo!“ Po kóždym spěwnym přinošku – hač solistiskim abo ansamblowym – a po kóždej choreografiji njelutowachu ze sceniskim aplawsom. Powšitkowny tenor publikuma: „Wulkotne předstajenje!“