Mjezynarodna konferenca z wobdźělnikami z 15 krajow w Budyšinje

Budyšin (SB/bn). „Giving minority languages a voice – Mjeńšinowym rěčam hłós dać“ je hesło mjezynarodneho projekta „Phōnē“ (SN rozprawjachu). Pod samsnym nadpismom wotmě so we wobłuku mjenowaneho projekta minjeny kónc tydźenja konferenca w Budyšinje ze zastupjerjemi na nim wobdźělenych wosom europskich jewišćow a z hosćimi ze sydom dalšich krajow. „Je wulkotnje tu telko ludźi z cyłeho swěta powitać směć. Z tymle historiskim wokomikom spjelni so són, na kotrehož zwoprawdźenju smy dźesać lět dźěłali“, podšmórny intendant hosćićelskeho Němsko-Serbskeho ludoweho dźiwadła Lutz Hillmann na zahajenskej ceremoniji zašły pjatk na hłownym jewišću. „NSLDź je laboratorij, w kotrymž Serbja a Němcy kóždy wot kóždeho wuknu. Njech so nam z ‚Phōnē‘ něšto podobne zešlachći“, wón zjima.