Na třoch njedźelach we wječornej hodźinje steji w Budyskej tachantskej cyrkwi třidźělny rjad duchowneje komorneje hudźby na planje. Dźens tydźenja zahaji jón ansambl Nusmido z Halle nad Solawu, kiž je na interpretaciju srjedźowěkowskeje sakralneje hudźby hač k renesansy wusměrjeny.

Lubujemy a wobdźiwujemy stajnje znowa přewšo nadobne gotiske katedrale. Jich stołpy daloko do wyšin sahaja a dušu a ducha do njebjeskich sferow pozběhuja. Srjedźowěkowska architektura wužaduje sej wjele respekta a z tym wulku česćomnosć. Tola kajka hudźba so we wonej dobje, před někak tysac lětami, pěstowaše? Na spočatku steješe jednohłósna gregorianika. Kak so wona dale wuwi, a to do wjacehłósnosće hač k wuměłskej harmoniji renesansy, pokaza ansambl w Božim domje, kotrehož zakładny kamjeń bu w tejle dobje kładźeny. Zo pak bychu přitomni so lóšo zanurić móhli, poda farar Wito Sćapan krótki zarys do tehdyšeho politiskeho połoženja.