Kaž přeco běchu žurnalisća jednotliwych redakcijow njedawno na fotowy termin do stadiona FC Energije Choćebuz přeprošeni. Na tajkich terminach zhonja rozprawjerjo wo rozsudach, na kotrež přiwisnicy towarstwa hižo žadosćiwje čakaja. Přetož nowi hrajerjo, kotřiž smědźa sobu na mustwowe foto, su takrjec kruće angažowani. To šeftrenar Claus-Dieter Wollitz hišće raz wobkrući, jako foto za hrajnu dobu 2025/26 nasta. Wokoło mjenowaneho termina wšak běchu zastupjerjo medijow nowinsku zdźělenku dóstali, w kotrejž buštej personaliji dokładnje tematizowanej. W njej rěkaše, zo FCE z Leonom Guwaru a Justinom Butlerom za tydźenjej na „dyrdomdej zachowanja klasy“ startuje. W zajimje tutoho, skerje moderatneho cila běštaj Leon Guwara a Justin Butler pola FC Energije zrěčenje podpisałoj. Štó pak w Delnjej Łužicy skerje njeznataj hrajerjej staj?