Chrósćicy (SN/MiR). Na wšě 130 zajimcow a zajimčow je sobotu rano na 8. fachowy dźeń 2plus do wjacezaměroweje hale „Jednota“ do Chrósćic přichwatało. Mjez nimi běchu w prěnim rjedźe wučerki a wučerjo serbskich a serbšćinu wuwučowacych šulow kaž tež kubłarki a kubłarjo a studenća wučerstwa.

Na zarjadowanju předstaji so zjawnje prěni króć Syman Pawlik, nowy koordinator za serbske naležnosće regionalneho stejnišća krajneho zarjadnišća za šulu a kubłanje (LaSuB). Wón je přitomnych po programje wjedł a rjekny: „Fachowy dźeń 2plus je so w zašłych lětach na forum wuměny a diskusije wuwił. Wažne je, zo so njerěči jenož wo tym, kak wuspěšna je praksa, ale runje tež wo tym, hdźe su wužadanja. Tute mamy pomjenować, wo nich diskutować a zhromadnje za rozrisanjemi pytać.“