Budyšin (SN/bn). Prapremjera kompozicije „Z Abrafaxami přez časy“ tworješe wjeršk jubilejneho swjedźenja „50 lět Abrafaxy“, kotryž su Serbski ludowy ansambl, nakładnistwo Mosaik Steinchen für Steinchen a Załožba dr. Greogoriusa Mättiga předwčerawšim w Budyšinje wuhotowali. Twórba Vincenta Strehlowa wotbłyšćuje lěttysacy přesahowace dyrdomdeje comicsoweje trójki a cituje hudźbne charakteristika kónčinow, kotrež su Abrax, Brabax a Califax w mjeztym 599 wudaćach měsačnje wuchadźaceho magacina wopytali. Pod nawodom Soyoung Kim zahra orchester SLA nimo toho wurězki ze „Sinfonije Abrafaxow“ a předstaji zhromadnje z rěčnikom Pětrom Cyžom aktualnu inscenaciju ansambla „Abrafaxy a Čorny młyn“, wobě tohorunja spisanej wot Strehlowa. Wupředaty koncert bě zdobom z přiležnosću předstajić nowu knihu „Abrafaxy a Čorny młyn“. Dwurěčna serbsko-němska publikacija posrědkuje prěni dyrdomdej trójki we Łužicy a wopřijima CD, z kotrejž hodźi so inscenacija w formje słuchohry naposkać.