Budyšin (SN). Zwjazk serbskich wuměłcow (ZSW) je wčera swoju lětušu hłownu zhromadźiznu w Budyskej Röhrscheidtowej bašće wuhotował. Najwažniši dnjowy dypk nastupaše přestorčenje přichodneje wólbneje zhromadźizny a z toho wuchadźace podlěšenje legislatury aktualneho předsydstwa hač do kónca lěta 2026. Wotpowědny namjet je wjetšina 24 přitomnych bjez napřećiwneho hłosa přiwzała. We wobłuku dźěłoweje a wěcneje rozprawy wuzběhny předsyda towarstwa Jan Bělk, zo je so „po před lětomaj nastorčenej diskusiji a po wobšěrnych rozmołwach ze zarjadom Załožby za serbski lud a z Domowinu docpěło, zo je załožbowa rada lětsa w juniju wobzamknyła zwyšenje honorarow za čitanja na maksimalnje 350 eurow“. Klětu chce ZSW dwanaće tajkich zarjadowanjow organizować, runje telko kaž lětsa.