Žitawa/Budyšin (SN/MiP). Dohromady štyri nahrawanske terminy w nadawku digitalneho regionalneho radijoweho sćelaka Radio Zett w Žitawje steja tute tydźenje w protyčce Michała Cyža, šefa Budyskeho Studija LUCIJA. Z podpěru basnika Benedikta Dyrlicha produkuje tam radijowy žurnalist Andreas Herrmann štyri nowe wusyłanja za lětuše – mjeztym hižo třeće – „Serbske čitanske pućowanje“.

Hižo nahrawali a tydźenja jako podcast na internetnej stronje radija wozjewili su čitanje Marki Maćijoweje a Měrany Cušcyneje z antologije „Der Fiedler unterm Dach“. Kniha bě wóndano w Ludowym nakładnistwje Domowina (LND) wušła a wobsahuje prozu serbskich awtorow w času mjez 1945 a 1990. W druhim, tohorunja hižo wozjewjenym wusyłanju čita basnica a wučerka na Serbskim gymnaziju Budyšin Sylwija Šěnowa basnje ze swojeje zběrki „Mosty přez morjo“, kotruž bě LND před lětomaj wudało.