Klětu wokoło jutrow wostanje jeje městno na wjacorych łužiskich jutrownych wikach a tež w Budyskim Serbskim muzeju prózdne. Dnja 23. nowembra bě ludowa wuměłča Edeltraut Gründelowa zemrěła. Za swoje wužrawane a škrabane jutrowne jejka ze serbskimi mustrami a hrónčkami bě Wojerowčanka daloko a šěroko znata.
Edeltraut Gründelowa narodźi so 13. februara 1949 we Wojerecach w starym měsće, kiž rozrosće bórze na srjedźišćo brunicoweje industrije. Jeje swójba měješe serbske korjenje. Mać Frieda Hawštynkowa pochadźeše z Ćiska a wowka Marja Bartušcyna chodźeše hišće we Wojerowskej serbskej drasće.
Edeltraut Gründelowa nawukny powołanje kucharki a dźěłaše w gastronomiji, najprjedy pola wikowanskeho drustwa HO, potom w zawodnej kuchni milinarnje Wjelcej a w Euro-šuli Wjelcej. Wjele lět wuwučowaše wučomnikow.
