Serbski institut hotuje so z pozitiwnej bilancu na jubilejne lěto

Budyšin (SN/bn). „Přeco hišće wobhladuje so Serbski institut (SI) častodosć jako poměrnje małe slědźenišćo. Hladajo na něhdźe 70 wědomostnych projektow, kotrež hač do 80 sobudźěłaćerkow a sobudźěłaćerjow lěto wob lěto wobdźěłuje, pak tónle wobraz wobstejnosćam dawno hižo njewotpowěduje.“ Z tymile słowami zahaji direktor SI prof. dr. Hauke Bartels wčera nowinarsku rozmołwu, w kotrejež wobłuku zastupjerjam medijow bilancu nachilaceho so lěta 2025 kaž tež wuhlady na klětuši 75. institutny jubilej předstaji. Naspomnjena ličba projektow wopřijima nimo slědźenja na tradicionalnymaj polomaj SI, potajkim rěčespyta a stawiznow, mjeztym tež samostatny wotrjad za regionalne wuwiće a škit mjeńšinow, (přirunowace) kulturne wědomosće a kopicu interdisciplinarnych kooperacijow. „Bjez solidneho bazoweho financowanja njeby móžno było, wšitke tele nadawki spjelnić“, podšmórny Bartels na institucionalne spěchowanje ze stron Załožby za serbski lud pokazawši, kotrež wučinja něhdźe tři miliony eurow wob lěto.