Nakładnistwa regiona prezentuja so w Lipsku ze sepju nowych knihow

Budyšin (SN/bn). „Dźeń a mjenje ludźi čita knihi“, zahaji jednaćel Ludoweho nakładnistwa Domowina Syman Pětr Cyž nowinarsku rozmołwu w foyeru Němsko-Serbskeho ludoweho dźiwadła, na kotrejž hornjołužiscy wudawaćeljo wčera swoje programy za lětuše Lipšćanske knižne wiki předstajichu. Hladajo na porno lońšemu wo něhdźe tři procenty niši cyłkowny wobrot branše kaž tež na „aktualneje krizy na Bliskim wuchodźe dla wotwidźomnje stupace kóšty“ je ćim wažnišo, so na jednym z najwjetšich zarjadowanjow swojeho razu prezentować. Za LND same wšak bě minjene dwanaće měsacow „najwuspěšniše w zańdźenych 13 lětach“, Cyž wuzběhny. Předewšěm publikacija „Chrósćicy“, kotraž bě składnostnje 800. róčnicy prěnjeho naspomnjenja wsy wušła, wopokaza so jako bestseller. Njezadźiwa tuž, zo chce ju LND na swojim stejnišću w Lipsku jako ćežišćowy titul prezentować. Nimo toho wuzběhny Cyž nowostki, kotrymž přicpěwa, zajim wopytowarjow wikow budźić.